وزه‌ی خۆر، مه‌رج و بواری به‌كارهێنانه‌كانی    
(3/7/2013)



گرینگیدان به‌وزه‌ی خۆر وه‌ك سه‌رچاوه‌یه‌كی وزه‌ ده‌گه‌ڕێته‌وه‌ بۆ سه‌ره‌تای سییه‌كانی سه‌ده‌ی رابردوو، كه‌ به‌هۆی توێژینه‌وه‌ی به‌رده‌وامه‌وه‌ توانرا سوود له‌ماده‌ی سلیكۆن وه‌ربگیرێت، به‌ڕێكخستنی به‌شێوه‌یه‌كی ئه‌ندازه‌یی وا كه‌ بتوانێت وزه‌ی خۆر بگۆڕێت بۆ وزه‌ی كاره‌با به‌توانای گۆڕینی (6%). له‌دوای ساڵانی حه‌فتاشەوە وڵاتە ئه‌وروپییەکان گرنگییەکی گه‌وره‌یان به‌و بواره‌ دا، ئه‌وه‌ش دوای هه‌ستكردنیان بوو به‌مه‌ترسییه‌كانی نه‌مانی په‌ترۆڵ و پیسبوونی ژینگه‌. بۆچی وزه‌ی خۆر؟ مرۆڤ به‌رده‌وام به‌دوای سه‌رچاوه‌ی نوێی وزه‌دا ده‌گه‌ڕێت بۆ پڕكردنه‌وه‌ی پێداویستییه‌كانی، به‌ڵام هه‌ندێ له‌و وزانه‌ تێچوونیان زۆر به‌رزه‌، هه‌ندێكی تریشیان ده‌بنه‌ هۆی پیسكردنی ژینگه‌، بۆیه‌ له‌ئێستادا بیر له‌و وزانه‌ ده‌كرێته‌وه،‌ كه‌ تێچوویان كه‌مه‌و زیان به‌ژینگه‌ ناگه‌یه‌نن و پێیانده‌ڵێن «وزه‌ پاكه‌كان». ئەو سەرچاوانەی بەوزەی پاک دەناسرێن، له‌نێویاندا وزه‌ی خۆر هه‌یه‌، کە رکابەرێکی بەهێزی سه‌رچاوه‌ نوێ نه‌بووه‌كانە (نه‌وت، گازی سروشتی، خه‌ڵووزی به‌ردین) کە بەردەوام مه‌ترسی ته‌واوبوونیان له‌سه‌ره‌و جارێكیتر به‌ئاسانی دروست نابنه‌وه‌. ئەوەش لەکاتێکدایە، کە وزەی خۆر به‌مزوانە پێشبینی كۆتایی هاتنی ناکرێت، ئه‌مه‌ جگه‌ له‌وه‌ی كه‌ وزه‌ی خۆر هیچ پاشماوه‌یه‌كی ره‌ق و شل و گازیی نییه‌و پێویستی به‌كڕینی سه‌رچاوه‌ی وزه‌ نییه‌، ئه‌مه‌ش وا ده‌كات، ئەو‌ وزەیە رۆژ به‌ڕۆژ توێژینه‌وه‌ی زیاتری له‌باره‌وه‌ بكرێت، بۆئەوەی توانای به‌رهه‌مهێنانی گه‌وره‌ترو بڕی تێچووشی کەمتر بکرێتەوە. به‌كارهێنانه‌كانی وزه‌ی خۆر دوای ئه‌وه‌ی كه‌ زانیمان بۆچی هه‌وڵی به‌ده‌ستهێنانی وزه‌ی خۆر ده‌درێت و بۆچیش هه‌موو جیهان وه‌كو جێگره‌وه‌ی داهاتووی وزه‌ ته‌ماشای ده‌كه‌ن، پێویسته‌ بواری به‌كارهێنانه‌كانیشی بزانین، کە دیارترینیان ئەمانەن: - بنیاتنانی وێستگه‌ی خۆری یان كۆمه‌ڵگه‌ی شانه‌ خۆرییه‌كان بۆ به‌رهه‌مهێنانی وزه‌ی كاره‌با. - كارپێكردنی تاوه‌ره‌كانی په‌یوه‌ندی له‌هه‌ندێ ناوچه‌ی دوور له‌شاره‌كان، كه‌ تۆڕی كاره‌بای پێناگات. - گه‌رمكردنه‌وه‌ی ماڵان له‌ڕێگه‌ی پێدا تێپه‌ڕینی سیستمی بۆری گه‌رم. - به‌كارهێنانی له‌شیكردنه‌وه‌ی ئاودا. - كارپێكردنی هێماكانی هاتوچۆ. - رووناككردنه‌وه‌ی شه‌قامه‌ سه‌ره‌كییه‌كان. -كارپێكردنی هه‌ندێ ئامێری سووكه‌ وه‌كو (رادیۆ، سه‌عات و ژمێره‌ر (الحاسبة‌). - ئیشپێكردنی ئۆتۆمبێل به‌وزه‌ی خۆر، كه‌ خێراییه‌كه‌ی ده‌گاته‌ (96) كم/ سه‌عات. مه‌رجه‌كانی به‌رهه‌مهێنانی وزه‌ی خۆر ئه‌گه‌رچی وزه‌ی خۆر جێگره‌وه‌یه‌كی باشی وزه‌ی ئاساییه‌، به‌ڵام به‌ده‌ستهێنان و به‌رهه‌مهێنانیشی ئه‌وه‌نده‌ شتێكی ئاسان نییه‌و كۆمه‌ڵێك مه‌رجی خۆی هه‌یه‌، وه‌كو: 1. شوێنی جوگرافی (هێزی به‌ركه‌وتنی تشیكی خۆر، پله‌ی گه‌رمی، خێرایی با). 2. جۆری ته‌كنۆلۆژیای به‌كارهاتوو بۆ به‌رهه‌مهێنان. 3. كوالێتی و توانای پێكهاته‌كانی. 4. نزیكی وێستگه‌ خۆرییه‌كه‌ له‌شاره‌وه‌ یان نزیكیی له‌تۆڕی كاره‌باوه‌. نابێت ئەوەش لەیاد بکرێت، کە ئه‌و جۆره‌ وزه‌یه‌ش وه‌كو هه‌ر شتێكیتر لایه‌نی باش و لایه‌نی خراپی خۆی هه‌یه‌، كه‌ ئه‌مه‌ دیارترینیانه‌.. لایه‌نه‌ باشه‌كانی - دامه‌زراندنی وێستگه‌و كارپێكردنەکەی پێویستی به‌كاتێكی زۆر نییه‌. - پێویستی به‌پڕكردنه‌وه‌ی وزه‌ نییه‌. - هیچ پاشماوه‌یه‌كی پیسكه‌ری هه‌وایی دروست ناكات. - ده‌توانرێت بۆ ماوه‌یه‌كی درێژ به‌كاربهێنرێت. لایه‌نه‌ خراپه‌كانی - به‌راورد به‌تێچوونه‌ به‌رزه‌كه‌ی بڕی به‌رهه‌مهێنانی وزه‌ی كه‌مه‌. - ناتوانرێت كاره‌با به‌رهه‌م بهێنرێت له‌كاته‌كانی شه‌و یان یان ئاسمان هه‌ور بێت (له‌ژێر كاریگه‌ریی كه‌ش دایه‌) - به‌رده‌وام پێویستی به‌ نۆژه‌نكردنه‌وه‌ هه‌یه‌.