بەپێی لێكۆڵینەوەكان بەرزبوونەوەی پلەكانی گەرما جەنگەكان زیاتر دەكات    
(5/8/2013)



بەپێی لێكۆڵینەوەكان بەرزبوونەوەی پلەكانی گەرما، دەبێتە هۆی زۆربوونی جەنگەكان. سۆلۆمۆن سایان پسپۆڕ لە زانكۆی برینستۆنی ئەمریكی دەڵێت: لە ئێستادا چەندین گریمانە لە ئارادان سەبارەت بە پەیوەندی نێوان بەرزبوونەوەی پلەی گەرما و دروستبوونی شەڕوكوشتار، بۆ نموونە ئاڵوگۆڕەكانی كەشوهەوا و بەرزی پلەی گەرما كاردەكاتە سەر كەرتی ئابووری، بەتایبەت لە وڵاتە كشتوكاڵییەكاندا. بەپێی وتەی ئەو شارەزایە، لەكاتی بەرزبوونەوەی پلەی گەرمادا، بەرهەمەكانی كشتوكاڵ روو لە كەمبوونەوە دەكەن و، ئەوەش دەبێتە هۆكارێك بۆ چەك هەڵگرتن و هاتنە ئارای جەنگ. بەپێی دەرەنجامی 60 توێژینەوەی زانستیش كە لەلایەن زانایانەوە ئەنجامدراون، دەركەوتووە كە بەرزبوونەوەی پلەكانی گەرما بەشێوەیەكی بەرچاو، دەبێتە هۆی زۆربوونی ململانێی نێوان تاكەكان بەڕێژەی لەسەدا چوار، بەڵام لە هەمانكاتدا ململانێی نێوان كۆمەڵ و گرووپەكان بەڕێژەی لەسەدا 14 بەرزدەبێتەوە. هەر بۆیە زانایان پێشبینی ئەوە دەكەن لەسەروبەندی ساڵی (2050)دا، جەنگ و شەڕی نێوان وڵاتان بەڕێژەی 50 لەسەد زیاد بكات، ئەگەر بێتو نەوەكانی داهاتوو خۆیان لەگەڵ دیاردەی بەرزبوونەوەی پلەكانی گەرمادا نەگونجێنن.